شەهێنی دڵ ڕفێنی خەم ڕەوێنی ڕووگەشی جوانی

شەهێنی دڵ ڕفێنی خەم ڕەوێنی ڕووگەشی جوانی
حەسود کوێر بێ لە حاندت ئەی کچی نازداری بۆکانی

لە بەر بەژنی بڵیند و ناسکت حەقیانە سەر داخەن
چنار و عەرعەر وشمشاد و کاج و سەروی بوستانی

لە شۆخ و شەنگییا وێنەم نەدیوی شەرتە نازانم
لە حۆری هەڵبڕاوی یا لە تیرە و هۆزی پەریانی

لە وردی خاڵی سەر کوڵمت ئەرەستوو واقی وڕ ماوە
لە تەسویری برۆی تۆ عاجز و بێ چارەیە مانـــی

دەمت عیسا سفەت مایەی ژیانە، لەمپەری گیانە
لەشی مردوو هەناسەی تۆ، وەبەر دێنێتەوە گیانی

خزر بۆ هێندە عەبداڵ بوو بە دووی سەرچاوەکەی ژینا
تنۆکێکە لە نێو شیوی مەمانت، ئاوی حەیوانی

لە چاغی پیرییا دیارە وەها بۆت بوومە پەتیارە
لەوانەم مل بدەم بەو کارە کردی، شێخی سەنعانی

لە سەیری باخی میراوا و تەماشای حەوزە گەورەم چی
زنەی بەر گەردن و نێو باخی سینەت، خۆشە سەیرانی

لە وەسفی ئەو خەت و خاڵە ، قەڵەم کۆڵە زمان لاڵە
دەسم بەو دوو لیمۆ کاڵە نەگا، دەمرم لە سوێیانی