گل بیر سنی آغوشه چکیم گول لر ایچینده

گل بیر سنی آغوشه چکیم گول لر ایچینده
تا بنزریم اولسون صدفه گوهر ،ایچینده

قوی قول لاریمی بوینووا آهسته سالیم تا
یاقوتی سالاق حسرته انگشتر ایچینده

باخدیم بو گوزل لر آراسیندا سنی سئودیم
الماسی سئورلر هامی سیم و زر ایچینده

سینه م ده سوروشسان اورگین حالینی بیر گون
فکر ائیله اوزرلیک دی یانیر مجمر ایچینده

قوی زولف لرین باغینا بیر لحظه گیریم تا
سر خوش دولانیم دسته ی نیلوفر ایچینده

زاهد منی تشویق ائله دی ترک شرابه
بیلمیر کی نه لر من گورورم ساغر ایچینده

یوخسول لارا احسان ائله سن لعل لبین دن
یاز دفتره طوفانیده شاعرلر ایچینده

تورکون غزلین هر یئره سوغات آپارار لار
طبعیم قوشو از بس کی گزیر شکر ایچینده