دولانیم باشینا ساقی منه بیرباده گتیر

دولانیم باشینا ساقی منه بیرباده گتیر
قویما یاددان چیخا کئچمیشلری سال یاده گتیر

دئمیرم خونچا بزه دوز قدحی سفره لره
دئیرم من نجورام سنده او جور ساده گتیر

خمارام فرصتی فوت ائیلمه دولدور وئر ایچیم
سنه قربان من اولوم اولما میش افتاده گتیر

چاغیر حال اهلی ییغیلسین بو گئجه دوره میزا
هامی چالسین اوخوسون شوریله فریاده گتیر

نئیلیرم بیر گوزلین فکری باشیمدان چیخمیر
گئجه لرده گورورم عالم رویاده گتیر

اعتبار یوخدو عومورلرده بو گوندن صاباحا
کیم قالیب بیزده قالاق ساقی بودنیاده گتیر

ساغلیغیندا ایشیوی اکبر اوزون سال نظاما
آرخایین اولما اولندن سورا اولاده گتیر