توت الیمدن بو همان الدی فراقینده سنون

توت الیمدن بو همان الدی فراقینده سنون

یادیمه سالماق هامان باشه چالاردیم گئجه لر


حسن رخساریوی رؤیاده چکردیم قلمه

قلبیمی قاب ائلیوب قابه سالاردیم گئجه لر


بونا خاطیر کی آدین دوشمیه اغیار الینه

دوز کیمی آدینی یازدیقجا یالاردیم گئجه لر


بئله سیزلاردی اوره ک یادینه سالدیقجا سنی

قوش کیمی یئرده دوشه ردیم چابالاردیم گئجه لر


بلکه سن ساغ یاشییب ساغ دولانیب ساغ گزه سن

گؤزه لیم هر قادان اوْلسایدی آلاردیم گئجه لر


سن رقیبیمله گونوز سئیره چیخاردین چمنه

منده عشقینده سولاردیم سارالاردیم گئجه لر


گؤزلرین یادیمه دوشدوکجه اسه ردی بدنیم

سینه مه دیرناق آتاردیم یارالاردیم گئجه لر


تابلو اوستونده چکه ردیم سنی مین زحمتیلن

بیر باخیب اوستونه تئز رنگی جالاردیم گئجه لر


ایندی ده گئتمه لیسن گئت دئمیرم من ده گلیم

قاللام اوْل حالدا کی اوّلده قالاردیم گئجه لر


مکتب عشقیده مجنونیله من باهم ایدیم

غم ییغاردیم سینه مه غصه قالاردیم گئجه لر


مجنون اؤز عشقینی لیلایه گؤره بیلدیردی

من گونوز یازدیقیم عشقی قارالاردیم گئجه لر
شعر استاد جعفری دن