الهی چی مه دردت بی دوا با

الهی چی مه دردت بی دوا با
چَمَر بیرَت گریوه ات هه وه جا با

رنگه شادی نئینی تا قیامت
دلت تش بیره غم وات آشنا با

خیالت چی مِه پُر با دِ جگایی
سخونت بشگیه بَن بَن جگا با

زِنِه ای وِم شئونی شارِت بشیوَه
خدا ناری حوالَت وا خدا با

چِنی سردرگمم کردی دِ عشقت
دعا میکم که جا مالت سیا با

منِ وا کِلِ چَشِت بیچاره کِردی
نصیوت بی وفایی با جفا با

خُتِن سی ای دلِ ژارِم مئیری
چَشِ نازِت و خواری مبتلا با

سَئینی بارِغم قئم اشگنایه
قد و بالا تو چی دل مه دو تا با

دعا میکه دلم شویا ده وَر خاو
دِلِت بیوه بمونَه بی پیا با

موئَن لیوه دلی ناره ولم کو
زَلَم میره که نفرینم دعا با...