بافِه چویلِه که سَرِ شونتِه؟

بافِه چویلِه که سَرِ شونتِه؟
یا دلِ اِیلِه که سَرِ شونتِه؟

ره اِیروی قَند اَو اِبو مِن دلُم
دیری تو وَنده کُرَو مِن دِلُم

تا لَو و دِندونِ به یَک اِیزنی
وا جُمَتی تَش به دلُم اِیوَنی

سی تو که چشمت پُرِ دل پاکیه
تِیلِ دلُم چَندیه فِرناکیه

سیزِن و مِینا اِیکُنُم تا بیوی
وَسمِه به بُرگام اِینِهُم تا بیوی

مِیخک و مِهلَو بُنِ نام اِیوَنُم
گِیوه کَلویی سَرِ پام اِیوَنُم

دل که چی مَشکی سَرِ مَلارِتِه
چی بَره مِن چنگِ تیا هارِته

جُورِ اناری زِ تو دلخینِه دل
دردِ تیا کالِتهِ وُرچینِه دل

رَهتِه اِپاهُم که بیوهی سِتین
صُحوِ پِگه تا خودِ افتُو نِشین

کُر چِنُمی مَر که چینو لیوتُم
کَهره‌یِ نَرزی وَر اُو گیوتُم

افتوِ عشقُم دی نَدَهری ز دل
تا که ندادیمِه یه بَهری ز دل .