هِناسَم بیَه گُرگی ها دِ جونِم

هِناسَم بیَه گُرگی ها دِ جونِم
دِنونِش ها مینِه بَنِ سِخونِم

هِناسَم دردَه کِه دارِم میکَشِم
دِ زیرِ جور دَردِم ناتوونِم

میکَشِم آهِ سَردی وا هِناسَم
ای زخمِ کاری بُرَنَه اَمونِم

اَمونم بُرسَه سختَه تَنیایی
بَنِم تا کِه جِگِر زیرِ دِنونِم ؟

مِه رَه عُمرِم همیشَه نا هُمارَه
هُماری نارَه تا آخِر مِه دونِم

ولاتی ها دِ کارِ کُشتِنِ مِه
رَتی تنیا مَنِم وا دُشمِنونِم

نَه جایی هی سی رَتِه کِه بکَم کوچ
نه جایی دیچِه دارِم کِه بمونِم

گریوَه چاره نی مُردِه دَوامَه
مِنی بالی میکِم سی آسِمونِم

بمیرِم کاش تا بالی دِرارِم
که لَشِ شَکَتِم مین قُوری بونِم

#لر#فهیمه_نعمت_زاده #مینجایی