____________

____________
دور گئداخ آی اورگیم یوخدی بیزه بوردا باخان
هامئنئن سئوگیلی وار بیرجه بیزوخ تک دارئخان

دور گئداخ آی اورگیم بلکه اورکلر آلئشا
یارئمئز رحمه گلیب او بیزینن بیر دانئشا

دور گئداخ آغلاماغا آغلاماسام من اؤله رم
دلی دیوانه اولوب سینه می من مین بؤله رم

دور گئداخ بسدی اورک آز منی سن داردا بوراخ
بیر اوزاخ یئرده گئدیب آغلاماغا دینج اوتوراخ

دور گئداخ ایستمیرم یار گؤره آغلاردی گؤزوم
قوی یارئم اینجیمسین بیرجه بودور سنله سؤزوم

دور گئداخ بلکه یارئن باشقا بیر ایستکلیسی وار
گؤزی یوللاردا قالئب آرزوسودور کی گله یار

دور گئداخ،اولما بیزیم قیسمتیمیز گؤز یاشئدی
سببی یارئمئزئن ناز باخئشی گؤز قاشئدی

دور گئداخ آی اورگیم دردیمیزی بیز داشییاخ
آیرئلئقدان دانئشاخ یاردان اوزاخ بیز یاشییاخ

دور گئداخ حسرت اولوبدور بیر عؤمور سئرداشئمئز
گئجه گوندوز بو کدردن آخاجاق گؤز یاشئمئز

دور گئداخ عاشیقه دونیاده باخان اولمایاجاق
بو سهندین اوزی والله بیر عؤمور گولمیه جاق __________________________________