دەرسی ئازادی دەبێژێ چەک لە شانە کیژی کورد

دەرسی ئازادی دەبێژێ چەک لە شانە کیژی کورد
هیممەتی بەرزی لە دونیا بۆتە وانە کیژی کورد
لێرە کچ پارێزەی نامووس و خاکی خۆیەتی
ئێستە سومبول بۆ ژنانە لەم جیهانە کیژی کورد
پرچی کچ ئاڵای ژیانە دەیشەکێنێ بای ئەوین
چۆن دەبێ دیل تا گراوی نیشتمانە کیژی کورد
هەر وڵاتی کچ ببێتە پێشڕەوی ماڤی گەلی
ناکرێ داگیر بە هیچ کەس سوور بزانە کیژی کورد
کانی رۆحی کیژ سروودی ئەشق و ئیمانە و ئەوین
دژ بە سپڵەی خوانەناسی کورد قرانە کیژی کورد
نیوە پیاون ئەو کەسانەی ژن بە نیوە دادەنێن
ئێستە پێشەنگی خەباتی لاوەکانە کیژی کورد
گڕشنەی "پشکۆ" ی هومێدە جەرگی تۆتۆی نیشتمان
بێ لە کوردستان ببینە ژین و مانە کیژی کورد