جیراندا اولور

جیراندا اولور

گوزلیم، گؤزلرینین صحبتی هر یاندا اولور

بو ملاحتلی باخیشلار قوزی جیراندا اولور

بیر علاج ائت منه، ایستکلی طبیبیم سنسن

عاشیقین چاره سی اؤز سئودیگی جاناندا اولور

بولبول ایستر گولی،طوطی شکری، من ده سنی

عشق سئوداسی بو اوچ عاشق نالاندا اولور

نه طبیعت گؤروب عمرونده نه دونیا یئتروب

او گؤزللر کی، بیزیم آذربایجاندا اولور!

گول اگر بولبولی اینجیتسه وفاسیز دئمه یین!

قیزلارین تقصیری اولماز. گینه اوغلاندا اولور

بو گؤزه للیک کی سنین وار، گؤزلیم،انصافاً

نه ملک ده،نه پری ده،نه ده اینساندا اولور

مبتلا کؤنلومه،بیلمم نه اولوب هر گون ایتیر

آختاریر کن یئنه او زلف پریشاندا اولور

واحیدین بللی دئییل مسکنی پروانه کیمی

گاه شمعه دولانیر، گاه گولوستاندا اولور...