دور بیر علاج ایله من نالانه عمه

دور بیر   علاج   ایله  منِ  نالانه عمه

ویران ایدور گوگلوم ایوین ویرانه عمه

===

گوندوز گوزومده شام اولور شامه گلندن

قانه دونوب گوز یاشلاریم درد و محندن

آماده یم جان ویرماقا اکبر اولندن

گَلمور اجل عمروم چاتا پایانه عمه

===

من تک دوشر دامه بی بی هانسی عزیزه

غم لشکری دائم چخور منله ستیزه

جور و جفا ویرمور امان بو اشک ریزه

گوز یاشیمی هر دم توکور دامانه عمه

===

قیزلار چوخی بولمور ندن رنگیم سولوبدور

چولده قالاندان قلبیمه وحشت دولوبدور

سیلی دَیَندن بیر گوزوم کم نور اولوبدور

چارم ندور چاتور الیم درمانه عمه

===

کاش عمه بو ویرانیه اکبر گلیدی

اکبر قوجاقینده علی اصغر گلیدی

اَلده عَلم   سقای   نام آور  گلیدی

قربان کسیدیم اوچ گوزل مهمانه عمه

===

ای کاش اورکدن گَرد آلامی سیلیدیم

شامون جفا و مُحنتیندن دینجلیدیم

اکبر جمالین بیر گوروب اوندان اولیدیم

مدفن اولیدی نعشیمه ویرانه عمه

===

آخشام یانار همسایه ایولرده چراغلار

راحت یاتار من سنّیده خیردا اوشاقلار

اما قرانلیقدا منی غملر قوجاقلار

جبراً سالالار روحیمی زندانه عمه

===

شامه بابام گلسیدی من کامه چاتاریم

هجران غمون غربت سوزون باشدان آتاردیم

باهم اولاردوخ قول بویون راحت یاتاردیم

اوندا دییردیم زلفومه ویر شانه عمه

===

کرب و بلاده باشیمه کوللر اَلندی

محشر اوچولده گوزلریمده جلوه لندی

بیر بیر گیدوب قارداشلاریم قانه بلَندی

ویردی فلک گلزاریمی طوفانه عمه

===

من بیر قیزام اوچ سنّیده غملر اسیری

کرب و بلادن اولموشام غم دستگیری

دردیم یازور ایستور صله مندن ” نصیری”

گَل بذل ایداخ بیر تحفه ی شاهانه عمه