چال عاشیق سازینی، اوره گیم دولوب

چال عاشیق سازینی، اوره گیم دولوب
بعضا اینسان ایچون درمان بو اولور
سازین نغمه لری آخسین کونلومه
یوخسا چیچکلریم عطش دن سولور



چال عاشیق سازینی، بلکه سازیندا
اومودسوز حیاتا بیر اومید تاپیم
گل عاشیق سازیندا صبردن دانیش
بلکه دؤزمک درسین آغزیندان قاپیم



بیلیرسن آی عاشیق دردیمیز بیردیر
گل گئدک سازیندا عشق دن دانیش
سیم لرین دیلی ایله خلقی هارایلا
گل بو درده منله بیرلیکده یانیش



گل عاشیق بو آخشام داغلار باشیندا
نغمه لر سؤیله یک گوزللر ایچون
گل عاشیق بو آخشام عاشیق اولانا
دئیه ک غم چکمه یین دولدوروب ایچون



سحره جک چالیب، اوخویاق عاشیق!
بلکه اوره کده کی یارا بیتیش سین
چاخیرلاشیب چالاق اوجا سس ایله
قوی عاشیق سسیمیز یارا یئتیش سین



اولدوزلارلا اولاق بو گئجه همدم
اولکردن گل آلاق عشق الهامینی
بو گئجه چاغیراق تام عاشیقلاری
چاخیرا، چالقییا ییغاق هامینی



اینسان دردلرینی گل سازیندا چال
دوزوملی عاشیق لاردان حکایت ائت
گل، بیزه آی عاشیق عشق درسی وئر
اومیدسیز ساعاتدا دردیمیزه یئت