دیالوگ. شعر. لری شعر لری

دیالوگ. شعر. لری شعر لری
خدا رحمت کنه مرحوم بوامَ/که دایم ایگو گَپل دلبخامَ/بوا آدم زمختُ عاقلی بی/یه آدم هیکلوی ناتاهلی بی/یه غوری داشت که دایم چوی منش بی/هله ی بوری و بالا دومنش بی/همیشه سفره ی نونش الم بی/مزیف چوی و قیلونش الم بی/جخونی ایره من دَسل درازش/یه ساعت هم قضا نیبی نمازش/ستینی بی بوا زِر بار نیره/همی آدم ودیندای کار نیره/یو وابی کار اَ صُب تا پسینش/که قیلون ایکشی چوی که ودینش/فقیر از دار دنیا شنگلی داشت/یه پارینه ی ملوس زنگلی داشت/یه نقصی داشت که مهلی خاولو بی/امیدش غیره زا ته گاو سهو بی/خوشا خوش ایگو گاو مهلی گرونه/دوازده ماه سال ایگو وگونه/مِن هر پیری ایره سی گاو نرزی ایکه/و بالای گاو سهو هی قرض ایکه/دپر قرض ایکه تا سر ماه بیای/حواله ی دا که بلین گاو بزای/چقدر آدم نشسو سال پایی و پارینه ی بوا هرگز نزایی/ده غیرا خوش بی و تزبه عقیقش/برهکاری رسی تا هند جیقش/غروسی وا هف هشتای مرگی هم داشت/زمسونل که ایبی جو همی کاشت/غروسش پا پری گل باقلی بی/از ای صُب تا پسین مِن بِن کله ی بی/همو مِن بِن کله سیش گندم ایبو/بوا جونش غروسش بی خوش ایگو/غروس اَ یه ماشینی مِن دِه سوند/هف هشت روزی یه باری زورکی خوند/خلاصه تا یه شو مِن سه زمسون/روه ایکَشه و ایره من کله دون/زمسون بی و هر کس زر پتو بی/نه لوکه ی شوکُ نه پاسه کتو بی/روه سی خوش نشسو مرگل خه/گهی رون گهی بالو کله خه/یه جا پر که همو مرگل ملوس/هف هشتا مرگ خه غیرا غروس/خلاصه شو گذشتو صب ایای/حمار از پشت کوه روز ایدرای/بوا از خاو وریسا چی همیشه/وریسا تا بشوره دست ریشه/تیش سومسو دی در اشکناره/یه مشتی پر من صحرا پشکه داره/کله وازه ولی مرگلش نیسه/یه مرگی کلشَ هسه کلشَ نیسه/کلو وابی یه قردی سر صدا که/یه شوری دم کله مرگل عزا که/قسم خه غیرا زا امشو بشینم/بله ی نه سی روه نقشه ی بچینم/گوامشو اینشینوم من قطارش/هف هشتا تیربرناو دم من لارش/پسین ایوبی ایره ی زر شناشیر/غروس ای بنده وُ ایشین وو دیر/لحافی ایورده سر دوشونش/و در بی لور پنج تیر پرونش/یه قردی تیه ری که دشت وخاو ره/تماسا خسته وابی مشت وخاو ره/روه اومه ایبینه که کاهیره خاو/حمار ایره ی غروس هم دراوه/روه از ترس جونش سر صدا که/بوا ایپره برنوَ ولا که/تفنگه ایبینه سیل جای روه که/سه چهار تاتیره ودیندای روه که/یه دم سر ایخره ایوسه سر پشت/تفنگ اَ دسش ایره ی گاو هم کشت/ده وقتی دی که تش زی زندیش/و مه ایچینه تیر آ خریش/وریسا اومه ور بردی تکی زه/از او گَپل گرونوی قیمتی زی/گو بو اگر روزی گپ زندیی زه ی/گپو وابیری وُ چیما زنی ایسی/همیشه خاستت از دنیا گپو بوی/ولی دندون حرصت کشکلو بوی/