آرزوی زیارت

آرزوی زیارت

 

اولموشام مدّتدی قبروندن حسین دور آغلارام
ئؤلسم گلّم اورکده وار بو منظور آغلارام
**********
هر کس اولدی دهرده بیر مه‌لقانون عاشقی
منده اولدوم بیر حسین بیر کربلانون عاشقی
رسمدور عاشق اولار نی ‌تک نوانون عاشقی
اولموشام سر پنجۀ عشقونده مقهور آغلارام
**********
غصّه‌دن قانیله دولموش گؤگلومون پیمانه‌سی
اولموشام عشقونده من بیر نحویله غم خانه‌سی
آدیمی سسلر حسینیلر حسین دیوانه‌سی
ایلیوب عشقون منی دیوانه مشهور آغلارام
**********
من گدا،سن بیرجه شاهنشاه گردون بارگاه
گیزلین عشقیم وارسنه آگه‌سن ای سرّالاه
گر گدا شاهه اولا عاشق دگول شاها گناه
عشق جرم اولسا وارام جرمومده معذور آغلارام
**********
من گنهکاری آقا درک ایتممیش پیک اجل
گوشۀ چشمیله بیر لطف ایله ای صبح ازل
یا منی اِیسته گلیم یا جان‌ویرن وقتیمده گل
گورسون عزرائیل الیمده واردی منشور آغلارام
**********
گر منی ایتسه مَخَیّر کردگار ذوالمنن
کربلانی ایستوسن یا روضۀ رضوانی سن
ایسترم کربوبلانی نیلورم فردوسی من
قبروه قاللام مجاور تا دم صور آغلارام
**********
ایلورم بیر عمر دور شش‌گوشه قبرون آرزو
طوف ایدم قبرون قیلام اشگیله گردین شستشو
محشره بو خدمتیله اَخذ ایدم بیر آبرو
اولماسام بو خدمته ای‌شاه مأمور آغلارام
**********
بیرده گورسیدیم اگر بالای سرده دورموشام
کاسۀ چشمی سرشگ چشمیله دولدورموشام
اکبره پائین پاده بزم ماتم قورموشام
فاش ایدوب قویمام قالا بوعشق مستور آغلارام
**********
رحم ایله بو بی‌پناهین دیدۀ گریانینه
قویما ممزوج اولسون اشگ حسرتی دل قانینه
گؤگلوم ایستور قبرووی آند اُولسون اکبرجانینه
یئتمسم وصله گوزومده واردی تا نور آغلارام