بوری نَچو کُلِ گُیونم گِلا بار

بوری نَچو کُلِ گُیونم گِلا بار

مُلای صد قِصه زُونم گلا بار

مه کوری نا بِلَد وِل بیمه ئژ ری

تو دُونا بین، مِه نایُونم گِلا بار

تونی پَل و پَلامارِ دلِ مِه

خَریوی بی دِرَه تُونِم گِلا بار

نَچُو پِر نَگِر ئژ مالم بُوری بوس

کموتر مالی گیونم گلا بار

چَه بَم باینِه دُما دلتنگ و تَنیام

مِدُوم چی ئور و وارونم گلا بار

مِه کُوگی بیم کِلَه شیره مَخُونیام

فِرَه وَختَه کِزَه شُونِم گِلا بار

رَتَه رَتمَه سُتینِ دل، دُما تو

چی اَفتاوِ لُو بُونِم گلا بار

دِ ئاز ئِه نُوم دلِم نِیرم هِناتکَم

هِه نُومت ها وَ سَر زُونِم گِلا بار

یَه کُل دردِ تُونَه گِرتیمَسهِ وَر

بُوری هم درد و درمونم گلا بار