یاندیردی منیم کونلومو بیر قاشلاری قاره

یاندیردی منیم کونلومو بیر قاشلاری قاره
مژگانلاری اوخ تک سینمی ایلدی یاره

مین نازیله باخدی اوزومه صبریمی الدی
سالدی منی پروانه کیمین گور نجه ناره

هردنکی دیردی اوزومه صبح نسیمی
قالخیردی گویه سینمین اوستونده شراره

سالمیشدی کمند ساچلارینی چینینه ساری
ساندیم کی ساچیندان چکه جاخ او منی داره

آتدیقجا قدم کبک خرامان کیمی هردن
مین عشوه ساتیردی او گوزل من دل زاره

رخساری گوزل گوزلری شعلا لبی غنچه
اوخشاتدیم اونون قامتینی سرو چناره

اولسمده یریم جنته بنطر قوجا اغلار
آنجاق او گوزل من یازیغی قویسا مزاره