ای فلک یاخچی بیزی درده گرفتار ائلدین

ای فلک یاخچی بیزی درده گرفتار ائلدین

وسط دایره ده نقطه ی پرکار ائلدین

گوروم ای چرخ فلک نظم و نظامین پوزولا

نیه بس تهجه بیزی یاره گرفتار ائلدین

زولفون داراماخ رنجینی من شانه ده گوردوم
عشق آتشینی دهریده دیوانه ده گوردوم

هر نوع بشریله دولانوب هم قدم اولدوم

مردانه صفت ملتی میخانه ده گوردوم

گئجه لر آیه باخیب من سنی یاد ایله میشم

صبحه جان یاتمامیشام فکر و خیال ایله میشم

گه یاتوب گه اویانوب بیله خیال ایله میشم

من باخان آیه خدایا گوره سن یاردا باخر

اولموش گوزلیم ماه رخون آیه برابر
مستانه گوزون نرگس شهلایه برابر
دونیانی منه وئرسله سنسیز نه یه لازیم
هر بیر باخیشین هر ایکی دونیایه برابر


گونده منه باش ووران ، ایندی منه داش وورور
ایندی منه داش ووران، اوزگه لره باش وورور

اوزگه اگر داش وورا دردینه دوزماخ اولار

باخ بورا سوز بوردادی، داشلاری یولداش وورور