گل سنی بیرده باسیم باغریما تاریم؛ گئدیرم

گل سنی بیرده باسیم باغریما تاریم؛ گئدیرم
اؤپوم او تئللرینی نازلی نیگاریم؛ گئدیرم

بیلیرم؛ بیر ده سنی ناز ائده بیلمز بو الیم
گل منه؛ ناز ائله ای سئوگیلی یاریم؛ گئدیرم

چورویوب جان قفسیم، تاب و توانیم تؤکه نیب
آیریلیق گلدی اؤلوم اولدو حاصاریم؛ گئدیرم

گل آچیم سینه‌می قوی من داها سربست بوراخیم
دوستاق اولموش سؤزو، دای یوخدو قراریم؛ گئدیرم

عشق دولموش سینه‌مه، درد لاپ آرتیق قالانیب
یاندیریب سینه‌می بو آهیله زاریم؛ گئدیرم

من بوتون دردیمی میضراب ایله وئردیم تاریما
تاریمین چانتاسینا دولدو هاراییم؛ گئدیرم

سن بیلیرسن نئجه چکدیم بو زامانین غمینی
اوچورولموش قالا تک قالدی غباریم؛ گئدیرم

آغلاما گؤز یاشی پاسلاندیرار او سیم لرینی
ماهنی لار چال یاشاسین شانلی دیاریم؛ گئدیرم

غم یئمه چونکو گؤزل‌سن،سنه عاشیق تاپیلار
وای منیم حالیما کی سولدو باهاریم؛ گئدیرم

داها میضرابی توتا بیلمه‌ییرم نازین ائدم
گنج بارماقلاری قوی چالماغا چاغریم؛ گئدیرم

اوخو تاریم بو سؤزو سن اوخو سیرداشلاریما
قویمایین یئرده قالیب پاسلانا تاریم؛ گئدیرم

قالدی آذریارا نیسگیل کی تاری اولمادی هئچ
اؤز غروبوندا دئیه تارینا ؛یاریم گئدیرم ...