ائوده بیر ایل آه چکرم خبر یوخ

ائوده بیر ایل آه چکرم خبر یوخ

ائودن چیخام من او یانا یار گلی

تای توشلاریم چوله چیخا گون چیخار

من چیخاندا یاغیش گئدسه قار گلی

یازیق گوزوم آژلیغا دوز داریخما

بوگون صاباح باهار گلیر بار گلی

بیزه گله گلمیه بیر کال ایده

قونشوموزا هیوا گلی نار گلی

خان ائوینه شیر گلیر قویروق بیلار

بیزم ائوه کور ایت گله هار گلی

خلقه قوناق گلی گؤزو سورمه لی

بیزیم ائودن کور گتمه میش کار گلی

بختیمه آرواد نه چیخا بیلمیرم

بللیدیر کی سار ساغا سوسار گلی

بیر اوج اتک اندازادیر اگنیمه

سالیس بوری گن گلمه سه دار گلی

دولتیه یاس دا گله اوینایار

بیز کاسیبا توی گله آخسار گلی

غم یوکونن کد خدا نین هیسسه سی

خردل اولور بیزیم کی خالوار گلی

کده بیزی دویلله بیر هاوار یوخ

بیز بیر کلمه حق دانیشاق جار گلی

دارقا شاییدلار بیزه سرکار چیخار

دار دیبینن قورتولا سردار گلی

بوندان بئله اؤزگه گورم اؤزگه دن

میننت چکیر غیرتمه عار گلی

ایشجی تویق کسنده من باخاممام

بیلمم نئجه اؤرگینن وار گلی

غم دن منیم بیر عینک وار گوزومده

ایشیق آیدین گون گوزومه تار گلی

عشقیم دوشوب یادیما گوزلر داشیر

باهاردا سئل آدلانا چایلار گلی

چوخ شاعیرین طبعی دونار بوز کیمی

شهریارین شعریده قاینار گلی