ایمان یادآور

شیعریک لە خاتوون "ئیمان یادەوەر" شاعیری هاوچەرخی کورد


(۱)
[پڕم لە هیچ]
شەونییە یەک دونیا مەراق لەگەڵ خۆمدا نەخەوێنم
پێم دەڵێن: بیرمەکەرەوە
کەچی بیر لە بیرنەکردنەوەش دەکەمەوە
هێند، پڕبوومە لە هیچ
ئیتر پووچیش جێی منی تیانابێتەوە
دەمەوێت لەبارەی بێکەسی یەوە بدووێم
ڕوخسارێک نابینمەوە بێدەنگیم بشێوێنێت
هەموویان یەک پارچە
تابلۆی نیگەرانی و بێتاقەتیم پیشان دەدەن
پێنووسەکان لێرە بۆ مەرگ نووسینەوە دەژین
ئێمەش بۆ ژان.

ئێمە بەڵێنمان داوە بە کاڵکردنەوەی جوانیەکان ڕابگەین
ڕۆژ نیە گوڵێک بەدەستی پاسەوانەکانەوە سەرنەبڕدرێت
ئااای!! لە ئێمە چەندە بلیمەتین
بۆ بریندارکردنی پەپولەی خۆشەویستی
چەنده ترسنۆکین بۆ ژیانکردن

پێم بڵێ: ئەرێ چی دەزانین جگەلە
خوێکردن بە برینەکانی یەکتریدا
جگەلە کوژاندنەوەی چرایەکانی،
سەر ڕێگەی یەکتر؟
نا تۆپێم بڵێ: کەی بوو کۆتاجار پێکەنین؟
پێم وانیە بیرت بێت!!
ئیتر وای لێهاتووە هەموومان
شەڕبەتەنهایی بفرۆشین و
دەوار لەناو باخچەکانی غرووردا هەڵدەین



ڤیکدان و گڵاڵەکردنی:
زانا کوردستانی