شعرشهریار

#شعر#شهریار
«بو دنیا فانی‌دیر، فانی»‏
‏«بو دنیاده قالان هانی؟»‏
‏«داود اوغلو سلیمانی»‏
تخت اوستوندن صالان دنیا»‏
‏ «خسته قاسم»‏
♪♪♪
سنین بهره‌ن یئین کیم‌دیر؟ ‏
کیمینکی‌سن یییه‌ن کیم‌دیر؟‏
سنه دوغرو دئین کیم دیر؟
‏ «یالان دنیا! یالان دنیا!».‏
♪♪♪
سنی فرزانه‌لر آتدی،
قاپیب دیوانه‌لر توتدی،
کیمی آلدی، کیمی صاتدی،
‏ صاتان دنیا! آلان دنیا!‏
♪♪♪
سنی بایقوش‌لار آلقیشلار،
دلی ویرانه‌نی خوشلار،
دولان عقله سنی بوشلار
‏ ایچی بوش‌لا دولان دنیا! ‏
♪♪♪
چاتیب سندن کؤچن کئچدی
اصل جامین ایچن کئچدی
اولان اولدو، کئچن کئچدی
‏ نه ایستیردین اولان دنیا!؟
♪♪♪
آتی ازّل داغا صالدیق،
یورولدوقجا دالی قالدیق،
آتی صاتدیق، اولاغ آلدیق
‏ یهر اولدو پالان دنیا!‏
♪♪♪
سنه قارون لار آللاندی،
قیزیل‌دان تلّی قاللاندی،
باتیب ظلماته قویلاندی،
‏ اؤلوب تلی تالان دنیا
♪♪♪
قازانیب، هی تالانیبسان،
قالانیب هی جالانیبسان،
ازلدن چالخالانیبسان،
‏ یئنه ده چالخالان دنیا!‏
♪♪♪
ننه قارنی ایلک بئشیگین‏
قبرستانلیق صون دئشیگین
نه ایچرین، نه ائشیگین
‏ قارانلیق بیر دالان دنیا.‏
♪♪♪
نه قاندین کیم گول اکن دیر؟
کیم قیلیج تک قان تؤکن دیر
‏(تیمور) هله کورکن دیر،
‏ (چنگیز) جانین آلان دنیا
♪♪♪
ایگیت‌لرین باشین یئیه‌ن،
قوجالار بوزباشین یئیه‌ن،
قبیرلرین داشین یئیه‌ن،
‏ اؤزو یئنه قالان دنیا!‏
♪♪♪
بیری آینا، بیری پاس دیر
بیری آیدین، بیری کاس دیر،
گئجه طوی‌دور، سحر یاس دیر
‏ گول آچدیقدا، صولان دنیا.‏
♪♪♪
بوغولایدین دوغان یئرده
دوغوب خلقی بوغان یئرده
اوغول نعشین اوغان ‏ یئرده‏
‏ آنا زولفون یولان دنیا
♪♪♪
اوجاق ایکن سؤنه‌یمیشسن
چاناق ایکن چؤنه‌یمیشسن
نه پیس قاری ننه‌یمشسن،
‏ ناغیل یالان ـ پالان دنیا.‏
♪♪♪
یامان قورغو! ییغیلایدین!‏
طوفان‌لاردا بوغولایدین!‏
نولایدی بیر داغیلایدین!
‏‏ بیزی درده صالان دنیا