بوردی شهر بساتی جدید خانه

بوردی شهر بساتی جدید خانه
روستای گِلی خانه و نالسر ره یاد نکن

زمینده بزوعی کَرکوب و کُموا
اسب و لیفا و خرمن سر ره یاد نکن

دره خنی انبه و موز و میوه مارک دار
تِرش هلی و تَله سِه دارِ سر ره یاد نکن

گوسبند ره بروتی و بوردی کارسر
نمک لِسه و چرخه سر ره یاد نکن

دَکاردی شِبرو کُش،اسفالت سر زندی قدم
اسب راه و پرچین و کَلِنگ سر ره یاد نکن

دره سازنی در و پنجره آلومینیومی
دَرچِه و کارِک و چویی در ره یاد نکن

دونه طارم دله اِعِلی گوشت وره
اسبه آش و تلپا و گزنه سر ره یاد نکن

شونی نونوایی و گیِنی سنگگ و لواش
تندیر تو و پَرکو و تندیر سر ره یاد نکن

کَشِنی قلیون میوه ای و شونی کافه
تنباکو شاهرودی و سیگار زَر ره یاد نکن

پوشِنی مانتو و شلوار جین
نخ و کاتِلوم و دوک و چاله سر ره یاد نکن

سوار وونی ماشین کلاس بالا
کوچ گری و نیسان تاج سر ره یاد نکن

دره خریندی پسته و خشکبار
آغوز و فندق ونچال سر ره یاد نکن

هر کجه‌ی این دنیا که دری
دوست و رفق و خاشه مله سر ره یاد نکن

#کپی_ممنوع