دئدیلر سانکی منه پان تورکم!

دئدیلر سانکی منه پان تورکم!

من دئدیم سهو ائله دیز خان تورکم

ائلیمین دوشمنینه اوخ سونگو

ائلیمین دوستونا من جان تورکم

شانلی تاریخیم اولوب کئچمیشده

ائله ین دونیانی حیران تورکم

گون به گون شانیم اوجالماقدادی چون

شانلی دورانه گیرن شان تورکم

منه جان جان دئیه نه جان جان تورک

منه قان قان دئیه نه قان تورکم

داییم انسانلیق اولوب آمالیم

انسانا سایقیلی انسان تورکم

دده مین اوغلویام ایلکین گوندن

دده می من تانیاندان تورکم

منه یولسوز دئمه سین یولسوزلار

یولوم آیدیندی من اعیان تورکم

بیر گون اولدومسا سومئر، بیر گون ماد

من اورارتو ایله مهران تورکم

بیر گون ایلامدا من اولدوم مدنی

ماننایام قوتتییم اشکان تورکم

اسلامین بیر زامان اولدوم قیلیجی

اسلاما جارچی مسلمان تورکم

منه یولسوز دئیه نه ذولفقارام

سالارام مولکونه طوفان تورکم

سلجوقام غزنوی یم من صفوی

افشارام درک ائله شیروان تورکم

پارچا پارچا اولور آذربایجان

سانکی من بوردا سیخیلقان تورکم

خراساندان قوما، قومدان خلیجه

اصفهان شوش طبرستان تورکم

لوت کویرینده سوسوز قالسام دا

بیر یاشیل اؤلکه ده گیلان تورکم

کرمان اولموشدو منه تورک وطنی

چارماحال ایله خوزستان تورکم

باخ او تنگستانین اوغلانلارینا

باخ خزر ساحلی تورکمان تورکم

گیروه کوردستانا پای اولموشسا

آتمارام قزوینی تهران تورکم

ایندی یاد اوغلو منه یاد دئمه سین

گؤزو گؤرسون بوتون ایران تورکم

تولکو آسلان ایله گیرمز ساواشا

گئری دورسون کی من اسلان تورکم

بیر قیغیلجیم اونا اود پوسگورسم

دودمانی گئدر آسان تورکم

عاقل انسان کی دولاشماز تورکه

یوخسا من یوردونا وولکان تورکم

وطنیم یادلارا یورد اولمایاجاق

وطنیم ایچره خورامان تورکم

یوردومون تورپاغینا گؤز تیکه نی

ائله ین گونده هراسان تورکم

وطنیمدیر وطنیمدیر وطنیم

وطنیم آذربایجان تورکم...