دڵم تەنگە وەکوو خونچەی دەمی تۆ

دڵم تەنگە وەکوو خونچەی دەمی تۆ
سەرم گێژە لە گێژی پەرچەمــــی تۆ

دڵ و گیان و ژیانــــــــم دا بە ماچێــک
وتت پێک نایە زۆری مـــن کەمــــی تۆ

لە چەشنی ئاگرن کوڵمی گەشی تۆ
لە مار ئەسـتەمترن پرچی ڕەشـــی تۆ

بڵێم وەک چی دەچی، هەرگوڵ دەزانم
لە گوڵ ناسکترە ناســک لەشــــی تۆ

لە گوارەی پڕپەرەنگ دڵ پڕپەرەنگـــــم
چەماوی بەژن و باڵای شۆخ و شەنگم

لە سەر سینگی سپی چاوم سپی بوون
لە تاوی زەردە لیمـــۆت زەردە رەنگـــــــم

مامۆستا هەژار