‍

‍
1-شاطیر اوغلان گوروم آللاه سنه وئرسین برکت
قووی اونون یاخجی النسین ،خمیرین اللنسین

2-چوخ پیشیر یاخجی پیشیر گویده فیریلدات کوره گی
منبر اوسته چوره گین قووی قالانیب تئللنسین

3-تندیرین طور تکین عرشیده ن آلسین ایشیقی
ارسینین بیرق احرار تکین میللنسین

4-کاسیبین قیسمتی یوخ یاغلی پیلوو دوشله مه گه
بو یاوان سنگه کی بیر قووی سا آلیب سئللنسین

5-قیرتین قوربانی سن موشترینی تئز یولا سال
ائل ایچینده یاراماز آرواد اوشاغ وئللنسین

6-قووی ایکی ریاللیغی ساتسین خوزه ئین بیر ماناتا
دیشی دوشموش قوجانین آغزی نه دیر دیللنسین

7-او منیم شعریمه چوخ ماییل اولان وردسته
دئنه: شاعیر چوره گی قووی قوروسون گوللنسین

8-من لیغیرسا یئیه بیلسم ده فلوس لازیم اولار
بو سوسوز باخچا نه لازیم بو قه ده ر بئللنسین

9-ساری یازلیقدان اولان گوللی قیزارمیش سنگک
گره ک آغزیندا اریک تک ازیلیب هئللنسین

10-تهرانین غیرتی یوخ شهریاری ساخلاماقا
قاچمیشام تربیزه تا یاخجی یامان بئللنسین

11-باغچامیز فاسد اولوب ، هر گول اکیرسن آچماز
یئری داشلیقدیر گره ک توپراقی غربیللنسین

12-مدعاسی چوخ اولان طبل تهی پر با دووق
نئیله یک ضرناچی نین بورنو گره ک یئلله نسین

13-بو گیجللنمه دن آی چرخ فلک سنده یورول
بو حیاسیز گونه گوزلر نه قه ده ر زیللنسین

14-سعدی نین باغ گلستانی گره ک حشره قه ده ر
آلماسی سئله لنیب خورماسی زنبیللنسین

15-لعنت اول باد خزانه کی نظامی باغینین
بیر یاوا گوولبئسرین قویمادی کاکیل لانسین

16-آرزو جولگه لرینده بیز اکن مزرعه لر
دئییه سن ساقه لنیب قووی هله سونبیللنسین

17-قصه چوخ قافیه یوخ آختاریرام تاپاماییرام
یئریدیر شهریارین ،طبعی ده تئنبللنسین
#اوستاد_شهریاردان

@harameyn14