من زرآورد خیالم وگ دل بال ایزنه

مِن زرآورد خیالُم كَوگِ دل بال ایزنه

تیر تفنگی كِرده اِی دل كَوگَ مِن بال ایزَنه

مِن زرآورد خیالُم كَوگِ دل چال ایكنه

جاكَپَر برفَش نِشَهسِه تِیه ره مال ایكنه

مِن زرآورد خیالُم هَركَ بِی یارش خَشِه

چالِیَلمون پُر خرنگ و بیلَهَرَل مِن تَشِه

مِن زرآورد خیالُم پُر كنیت پَن تیر پرون

زین كنیتون اسبِ دلمَ تا برَیم "زنمَسكنون"

مِن زرآورد خیالُم هوفَ هوفِ باد اِیا

میش و بز كارَی وَرارِن كُرچپونُم شاد اِیا

مِن زرآورد خیالُم نی بزن شادُم بكن

یا كه ایمیرُم وَ عشقِش یا كه آبادُم بكن

مِن زرآورد خیالُم كُم زمین دِهرِهسَ بی

صفحَه صفحَش گُل نگین و بو چویل پیچِهسَ بی

مِن زرآورد خیالُم مَهسِ مَهس آبیدِمِه

چی گُلی وَر دَهسِ بادِ دَهسَ دَهس آبیدِمِه

مِن زرآورد خیالُم "آریا"ی عشقمی

كَوگِ مَهسِ چالِ "كوكَك" مِن هوای عشقمی

مِن زرآورد خیالُم كِهلَیِ دل بَهسَ بی

پاكریكی سر سَراَو بی سرتَوالُم خَهسَ بی

مِن زرآورد خیالُم شاعری دلخَهسَیَم

مِن "دِغَهزَل"دردَمندی عمریَه پابَهسَیَم

مِن زرآورد خیالُم پیتَ سر برفِش كُنُم

هرچه اِی دل پیت وَرارِه نیترُم وَصفِش كُنُم