یار قاصدی

یار قاصدی
سن یاریمین قاصیدی سن

اگلش سنه چای دئمیشم

خیالینی گوندره‌یب دیر

بس کی من آخ- وای دئمیشم

آخ! گئجه‌لر یاتمامیشام

من سنه لای- لای دئمیشم

سن یاتالی، من گؤزومه

اولدوزلاری سای دئمیشم

هر کس سنه اولدوز دئیه

اؤزوم سنه آی دئمیشم

سندن سونرا، حیاته من

شیرین دیسه، زای دئمیشم

هر گوزه‌لدن بیرگول آلیب

سن گؤزه‌له پای دئمیشم

سنین گون تک باتماغیوی

آی باتانا تای دنمیشم

ایندی یایا قیش دئییرم

سابق قیشا یای دئمیشم

گاه طویووی یاده سالیب

من ده لی، نای- نای دئمیشم

سونرا یئنه یاسه باتیب

آغلاری های های دئمیشم

اتک دولو دریا کیمی

گؤز یاشیما، چای دئمیشم

عمره سوره‌ن من قره گون

آخ دئمیشم، وای دئمیشم