بختیاری ایلمه ، مر که کوچیره

بختیاری ایلمه ، مر که کوچیره
ولاتم سرتا سرس ، پر نره شیره

خینمو به همدیه، هی ازنه جوش
تش گوگریمون ، نیبووه خاموش

هیچ دشمنی به ایلم نیبوه چیره
هر که چپ نیره ،حکمس به تیره

دشمنو ری به ریم ، ندارن زهله
بختیاری پا حرفسه ، نداره حیله

پیایل و زنگلم ، پر ز اصالت
کرگل و دورگلم ، پاک با زلالت

گرمسیر تا ایلاق ، ز هفت و چاره
بهونا پای زیده ، تشمال به کاره

به پا کوه تاراز ، میلس به پاهه
به لامردون ایل ، صد تا پیاهه

هم گپ و خان پیا، جور علیمردون
زره پوش ایلم ، شیری به دورون

هم پیا کلونتری ، به چی رضی خان
سردار اسعد بختیاری، پیای ایلخان

داشتیم بختیاری ، سرتیپ و سردار
به هر جنگی ابوون ، همه خبر دار

ایلم جوره زردکوه ، هی استواره
ز هر دشمنی هیچ ، باکی نداره

به هر طافه بگوی ، پر ز سواره
هر جنگی به کار بو ، برنو بکاره