صحوه باز افتو و مه جنگ اکنن

صحوه باز اَفتو و مه جنگ اِکُنن ..

تیر مِرزنگ إشونه ، اِونه کُه تُر گپ

گاله زنِه ، بَرد اِونه ..

رنگ و ری مه اِبُره ..

اِبو چی رنگ یه پاله پُر دُوو ..

زنه دک چی بنگشت ، که اَسیره به لِفات ..
نَتره فِر بِده باز ؛ نه تره گُم زنه یاه دَس بِنه ناس ..

اَفتو اِز پشتِ کُه گَپ زنه جار ،

هرچه دنیانه کهْو کِردی و خِف کِردی بَسه ..

شه بُهونت پُلُوفه أر بِدرام ..

بِل بِخونه هرچه بالِنده که اِز ترس تو شولیز اِگِره ..

جَمکو ای ظُلم گِرون ..

بِل بخونن نَر و لاس

بِل بِگردِن وا یک بَهده و بز ..

علف این تا سر گوزک ، بچرن شیشک و میش ..

برّه بیگون منه قاش ،
همه مندیر پَسینون به لِرشت .
که خُورن شیر زِدآ ..

تا تو واستادی چطَو جُم بخورِن ؟!

مو که یاهُم همه چی جون إگِره .

تیغ اَفتو زِ پسِ کُه کِه زَنه شَونِه یَه بال ..

بَنگ دام ایکُنه اَوقات بخیری اِده وآس ..

اِشرِشنِه یه لَیِن آرد خمونیِ لُری ..

بُز و میشونِه کُنه دَر که بِرن وآ گلِه کُه ..

دَرف و دولا شُمِ وآ مَشک بَره تا سر اَوُو ..

شُورِه و پُر إکُنه مَشکِه به پاله یَدمُون ..

مَشکِه إینه کشِ پَهلی ، پاله دَرگرنه به سر ..

إیکشِه تا سر تلواره ی مَشکا یَه دَنَر ..

اِیزنه دُوُ وَرِ مشک ..

تشِ تُنگی إکُنه مُچه وُرآرِه
زِ هویر ..

تَوه تَوسی اِکُنه ، إیپزه نون چند یه کُه ..

کُلِه مرغینه اِتیفنه همه صُحو ..

جُست خاگینه اِگرده تَمِنآس ؛ زیر کَه باز بجوره دوسه تا تخمِ دیه ..

سُرفِنه پهم اِکُنه

یه چپه نون خدا خوکرده ..

شیر گا زرده به پاله سرِ چاله کُنه تُوف ..

تُخم و خاگینه ی سُهر کِرده به اَندشت کُهی ، وآ کرِه و روغِن خَش ..

زِ گِلی نیکنه لم دآ ، إگو کُرّ رُود وُری ..
وُری ناشتاتِ بخور رَو سر درس ..

وُری ناشتاتِ بخورُ رَو سر درس ..