:

:
به سَرُم زیده خیالِ پَلَلِت ای یارِ پاری

همه شُو مو سیت اِخونم مِنه کوهِ آسماری

مو اِویدمه به شیمبار و ولاتِ کوهِ تاراز

که به دینِ تو بگردم ، تو به ویرِ عشقِ یاری

مو تَشُم خو هی بِلازه ، تو بیو بلازه تر کن

تو بخون بلال بلاله گُلِ مو تو چی قناری

مو به سی او گَرت و لیلت ، مَه و اَفتونه خریمه

همه مالانه مو گشتُم ، تو ایگوی خَور نداری

تو که وَندی به دلم خین ، مو اسیرِ چشم کالِت

زه مِنه دِنا و زَرده ، توبیو دی وا دیاری

مو هَمو پلنگِ زَردم ، زه هَمو قومِ گَپِ لُر

که به محکمی چی بَردُم ، زه ولاتِ بختیاری

یَه تَشی مِنه تیاته ، که زه دستت ایگروسم

مو به ویرِ بُرگِ یارم ، تو خو نُمزَدِ بهاری

مو تَمومِ آرِمونُم مِنه جونِ سُوزِ یاره

نَتَرُم که دل کَنُم زِت ، تو بیو دی وا هَیاری