سایقه شوئی دِ حونَه زَم وِ در

سایقه شوئی دِ حونَه زَم وِ در

رِکِ رَکِم بی دِ پا تا فرخِ سر

 

لیوئی دیم پا تشی کور وُ کِلیز

هی می گُت تش بُو بلیز تش بُو بلیز

 

بُو بلیز حا وات بیام تا تی خدا

حا بُحونِم مورِئی وانی خدا

 

جاشِ دونِم ها کجا نی میزِنَ

کَس چی مه نونَ خدا کی میزِنَ؟

 

نِصمِ  شُو،  وختی که مِ سردِم  مُوءَ

وَختِ جَرّ و تاوِّ قی دردِم مُوءَ

 

وختی مِ  سرتا وِ  پام دی میزنَ

آسِمو سیم ساز چپی میزنَ

 

وختی تا صو یی مِجُو بارُ میا

وِ مینِ تَژگا نُوَه دارُ میا

 

وختی ژاری شُونِ بی شُم سر میکَ

دردِ دل وا ساقی کوثر میکَ

 

وختی درویشی میمیرَ بی صدا

پُرسِ پوئه ش گرمِ گرمََ تی خدا

 

هر که گوش بیرَ خدا نی میزنَ

دِل زِوین رِنگِ وی وی میزنَ

 

هی میوَن وِشونِ رونِ نی خدا

هی می گُت مَر هی خدا ، مَر هی خدا

 

مَر خدا ئی شُونِ زیتِر کِل بَکَ

زِل وِرَز اَفتاو دِرا مِل مِل بَکَ

 

شُو دِرازَ ای تش کور وُ کِلیز

بُو بلیز وُ بو بلیز وُ بو بلیز

 

یِِ دَفَ سیلی دِ سرتا پامِ کِرد

تُن وِریسا دَس تَمَنا وامِ کِرد

 

گُت فِدای قد وُ بالات بام مِری

دیرَ جونِت تو دِمِِ لیوَه تِری

 

مَر چی مِِ آوارِه و بی مَسکِنی؟

نَنگِ دوس و خَنِزارِ دُشمِنی؟

 

رُو مِنِ ول کو و حال زارِ خُم

تا دِرارِم سر دِ کار و بارِ خم

 

وِش گُتِم ای عاشق پاکِ خدا

باثِ بانی رونَقِ خاکِ خدا

 

تو دِ ظاهر لیوِئی جونِ دلِم

مِنِ بیچاره دِ ظاهِر عاقِلِم