ایخم سر شو تا صب گه گپ بزنم بات

ایخم سر شو تا صب گه گپ بزنم بات
کل گاله کنم بی تو و هی شپ بزنم بات

تا بو گل هف زرده نه من پیز بفهمم
مهسی نه بدون عرق میز بفهمم

من گردنه یل سرنوا اگر گپ نزنی بام
لوه نیگرم اصلا یه نفس ویسمه سر پام

نومت که ایایه دلم ایلرزه و مث بید
دونم که تش عشق تو انگا تش بی دید

تی سیل تیه ت رو چنه دریا یه پشنگه
دنیی تشی یم تی تش عشقت یه چرنگه

مث پازن رم خرده که من دوز و دویه
من رگ رگم امرو تش عشق تو ورویه

نهلشتمه که ویسه و من سینه ی کوه دل
یاد دل مو دادیه کوه نه ایده و دم کل

کم بی غم دل سی کو چه اندازه لک آبی
یعنی که سر عشق تو وم صد کچک آبی

باهنده ی بی بال و پرم تا تو نه تی می
خین ایچکه و دل جگرم تا تو نه تی می

ای گل گل هفزرده همی دلخشی باغ
ریته م نگه هی تا که ننی سر جگرم داغ

اخمت که و من یک بره ایریزمه من یک
سر صورتمه باش یجا ایدمه دم چک

ایخم که وته زنده نبم تا و تو دیرم
تا وم نگرونی دلم ایخوا که بمیرم
🍃🌺