بارون خشی داره ایایه چه زلاله

بارون خشی داره ایایه چه زلاله
انگار خدا هم نگرون تیه کاله
شاید که تش عشق منه کرده بلالش
ک افتاسه و رو ایچنو هی خرس زلالش
ای گل بخدا ایخمت اندازه ی جونم
یعنی که غم عشق تو برناده امونم
هر تال و مرزنگ تو برنوی بلنده
هر پل تو دو تا بافه و برگل تو کمنده
از ایل بکش تا رسم و جویی و ماهور
ایخندنه من ری تو مث خوشه ی انگور
انگور کله سه که نخرده ایکنه مهست
بی ساز و نغاره ایروه پا و سر و دهست
گی آهوی رم خرده و گی کهره شکالی
گهی تهر عقاب سر حال من بالی
گهی باده و اوریشم و گهی برف و چویلی
یعنی که خدا دونه چه اندازه شکیلی
تا حرف تیه ت اومه دلم لال تو وابی
آهوی دلم کهره ی گیجال تو وابی
وابیدنه کم سو تیه لم من غم دیریت
ایندازه وره رو تیه لم من غم دیریت
بلبل بخدا بلبله سه تشک نییبو
اصلا ابدا خرس تیه م خشک نییبو
شو سیر و سیل تو و زلفل تو نییبو
هر چی مل من سرشه دوتا پل تو نییبو
صد بافه ی اوریشم تو داده یه زلفت
پیچیده یه اما و نظر ساده یه زلفت
زلفل تو و ره بردم و ایمونمه دادم
بی چونه یجا سر کش تو جونمه دادم
ناز نفسی نازلیی مونس جونی
تشت عسلن لویل سرخ تو و دونی
دونی که حساب همه چی رفته و دهسم
دونی که یو چن ساله کلویی کله مهسم
دونی که چقه ایخوامت و چن کیچه کلوتم
سرچشمه تنی تشنه ی خنده ی بکلوتم
دونی که گل مهرته سر حوصله کشتم
دونی که سر تاوه ی عشق تو برشتم
دونی که دلم کرده پغوره و گله ای نی
دونی که میون خم وخت فاصله ای نی
بارون رسی و شعر مو گل کرد و گل اشکفت
گل من دم در میل دهل کرد و گل اشکفت
لوخنده وری لویل هر دار دیاره
بارون که بیا هرکنه سر ذوق ایاره
بارون که بیا رفته یه لاس مو همیشه
هم تی تنه شش دنگ حواس مو همیشه
مث نم نم بارون بهاری تو و دونم
یعنی که ذری نقص نداری تو و دونم
لیسیده زبونی تشه زون بللوست
کافرکشن او برق تیه ل مهس و ملوست
بابینه و عشقی که بوینت درایایه
پیغمبر هر دینیه دینت درایایه
ایطو که دل تور مو وابیده اسیرت
دونم که یه رو روم مو ویبو دل شیرت
قربون یه کلغی بنیو هر چه درخته
نونی یه نفس دیر تو بیدن چقه سخته