بارون خَشی داره ایایه چه زِلال

بارون خَشی داره ایایه چه زِلال
ِ
اِنگار خدا هم نِگَرونِ تیه کال
ِ
شاید که تَشِ عشقِ مِنه کِرده بَلالِش

کِ اُفتاسه وَ رو ایچنو هَی خَرسِ زِلالِش

ای گُل بخدا ایخِمِت اندازه ی جونم

یعنی که غَمِ عشق تو بُرناده اَمونُم

هر تال وَ مِرزِنگِ تو بِرنوی بُلَنده

هر پَلِ تو دو تا بافَه وَ بُرگَلِ تو کَمَنده

از ایل بَکِش تا رِسَم و جَویی و ماهور

ایخَندِن و مِن ری تو مِث خوشه ی انگور

انگور کَلَه سه که نَخَرده ایکنه مَست

بی ساز و نِغاره ایرَوه پا و سر و دست

گَهی آهوی رَم خَرده و گَهی کَهره شِکالی

گَهی تِرِ عقابِ سَرِحالِ مِنِ بالی

گَهی باده و اوریشُم و گَهی برف و چَویلی

یعنی که خدا دونه چه اندازه شَکیلی

تا حرف تییَت اومه دلم لالِ تو وابی

آهویِ دلم کَهره یِ گیجالِ تو وابی

وابیدنه کَم سؤ تییَلُم مِن غَمِ دیریت

ایندازه وَرَه رَو تییَلم مِنِ غَمِ دیریت

بُلبُل بَخدا بُلبُلِ سِه تُشک نییبو

اَصلا اَبَدَاً خَرسِ تییَم خُشک نییبو

شَو سیر وَ سیلِ تو وُ زُلفَلِ تو نییبو

هر چی مُل مِنِ سَرِشِه دوتا پَل تو نییبو

صد بافه یِ اوریشمَ توَ داده یَه زُلفِت

پیچیدَه یَه اَما وَ نَظَر سادَه یَه زُلفِت

زُلفَل تو وَ رَه بُردُم وُ ایمونِمه دادُم

بی چونَه یَجا سَرِ کِشِ تو جونمَه دادُم

نازِ نَفَسی ، نازِلییِ مونسِ جونی

تَشتِ عَسَلِن ، لَویَلِ سُرخِ تو وُ دونی

دونی که حسابِ همه چی رَهتِه وَ دَهسُم

دونی که یُو چَن سالهِ کَلویی کَلَه مَهسُم

دونی که چِقَد ایخوُمِتُُ چَن کوچه کَلوتُم

سَرچِشمَه تِنی تِشنَی خَندَی بَکَلوتُم

دونی که گل مهرته سر حوصله کشتم

دونی که سَرِ تاوَیِ عشقِ تو بِرِشتُم

دونی که دِلُم کِرده پِغورمَه وُ گِله ای نی

دونی که میونِ خُمُ وخُت فاصله ای نی

بارون رَسی وُ شعرِ مو گُل کِردِ وُ گُلِ اِشکَفت

گُل مِن دَمِ دَر مَیلِ دُهُل کِردِ و گُل اِشکَفت

لَوخَنده وَری لَویَلِ هَر دار دیاره

بارون که بیا هَرکَنه سَر ذَوق ایاره

بارون که بیا رفته یه لاسِ مو همیشه

هم تَی تِنهِ شِش دُنگِ حَواسِ مو همیشه

مِث نَم نَمِ بارونِ بهاری تو وُ دونُم

یعنی که ذَرَی نَقص نداری تو وُ دونُم

لیسیده زبونی تشه زونِ بَلَلوسِت

کافَرکُشِن او برق تییَل مَهس وُ مَلوسِت

بابینه وَ عشقی که بُوینِت دَرایایه

پیغمبرَ هر دینیهَ دینِت دَرایایه

ایطو که دلِ تورِ مو وابیده اسیرت

دُونُم که یه رو ، رودِ مُو وَیبو دلِ شیرت

قربونِ یه کلغی بنیو هر چه درخته

نَونی یه نَفَس دیرِ تو بیدَن چِقَه سخته