دور واگشته خدا کُر مثه دختر کُنه مِش

دور واگشته خدا کُر مثه دختر کُنه مِش

کَشه می مِن سَرِش و غرق تیش پُر خَطِ چِش

مِشه سر رنگ حنا یا یخه یا زیتونی

رنگ خین کرده دو تا یی لُوَلِش قیطونی

منه گوشش بخدا هم یه دو تا گُل گوشه

عطر تهلی زنه تا حس کنه هر کس بوشه

طعنه زد یی زنه هُمساده که یی الیاسه؟

مرحبا نومه خدا یی چقه با احساسه

سِی کو سِی کُن خوشه مِی بیگ بِوین کرده جهوون

کَل عَزو کرده سِرِش رنگ سرِ کُر رمضون

رمضون هم بخدا طی تو که سر رآس نکه

سی کنین بی شرفی نی که دَ الیاس نکه

دیش بونگ ایده همش دختره یی الیاسو

ایسو باید بُگُمِت طی کَس و نا کس لاسو

پره من مال که کُر مانه بُلیت آویده

ایسو کم مونده بگن یی کُرُشون زاییده

آبرومون بخدا ره رمضون کاری کن

غضبی مِن سَرِمون یا که تو آزاری کن

حق دارن دوترل تا که بگن میره نسی

مثه الیاس فراوون،زنه نیسونه کسی

محو،آوی چه بگُم هر چه کُرِ دور تِنن

موندنهِ تا تشه زر چاله ی الیاس بنن

کُر که بینهِ مثه بُز بَر بَکه بَک ایکنه سیش

مثه دختر وَسرش باز لچک ایکنه سیش

کاش بُی دهسه خومم لاشته زر گِل بکُنُم

لغطی سر دل تو بعد تو کِل کِل بکُنم

کُرِ جونی خوته مِی دختر و طناز نکن

خوته بُی یه زنه شی کرده تو همساز نکن

مرد باید بخدا غره بدهِ هم مثه شیر

سرِ وختش بکُنهِ ناز گُلِش بُی دله سیر

سرگشته