بیو بارون بیو بارون بیو امشو پریشونم

بیو بارون بیو بارون، بیو امشو پریشونم
مو دارم حالِ زندونی بیو بعدِ تو زندونم

اِیارُم بِی دلم امشو یه چتری و یه بارونی
قدم بِی تو دلُم ایخو، بیو کهِ مِن خیابونم

وَ یادِ شویَلِ خوبو مو وِ دینِ تو ایگردُم
مو خَرسُم واتر آویدهِ مو امشو بی تو ویلونُم

وَ هر کو کهِ برَم هر شو، نشونی از تو ایگیرُم
وَ کو رهتی عزیزِ دل، بیو دردِ تو مِن جونم

یه بغضی مِن بُتُم اومهِ ،مو از بس بغضمهِ خَردُم
خَفهِ وابیدمهِ بس کهِ مو هر شو از تو ایخونم

مو از روزی که دا اومم، ندیدُم روزِ شادینه
مو باهندهِ یِ بدبختی نِشَهسِ سر دو تا شونُم

بلالُم کِردهِ ایی دیری، بلالُم کِرده اقبالُم
مو کورا نیبوهِ هر شو، تَشِ بی دیدِ قیلونُم

یه شویی زَه قمارُم کهِ،یه شویِ سرد و بارونی
زمونهِ بِی دلُم بد کهِ،زمونهِ کِرده دل خینُم

یه طوری زخمُم آویدهِ،گوال از دردِ دیری تو
که صد تا دکتر اَر بوهِن، مونهِ نیکُنهِ درمونُم

یه طوری بی تو داغونم، یه طوری بی تا نامیزون
که ایی الکُلِ قوربَک هم ،مونهِ نیکُنهِ میزونُم

#سهراب_عرب_زاده