بیا تا سیت بوئم د درد کوهنه

بیا تا سیت بوئِم دِ دردِ کوهنَه

بوئِم دِ دَردِ پیرِ بی نِشونَه

بیا هومرازِ دَردِ بیِ شماره
بیا آرومِ داغِ بای ایوارَه

مِه اسمِمْ ماتَمَ پِشنیمْ زِغالَ
خَنَه نارِم فقط غم سیمْ حِلالَ

مِه سی سوختِنْ اومامَه بِیلْ بمیرم
کِه تا روزی بوئَمْ آروم نِمیرِم

اومامَه تا کِه چَش سَرْ پُرْ دِ آوْ با
کِه هَر کَس وا مِنَه حونَشْ خِراوْ با

کِه هَرکَسْ وا مِنَه تَشْ بیره بَختِش
بَشینِم تا بَمیرِم نوئَه وَقتِش

اومامَه تا کِه شَر چی رو رِوُو با
بِینَه دُشمنِم پیریم جِوُو با

اومامَه تا کِه جا خَنِه شما بام
کِه بوفته بَختِ گَن هِه وا نِها پام

اومامَه تا بوئَه آو مینِ تَژگام
چی دارِ بیْ نیری،کَسْ نیسَهْ زیرْ سام

اومامَه تا چَشِ بارو بِوارَه
خُدا هَم سی دِلِم هورَه بیارَه

اومامَه تا دِلِ بَرد هَم بوئَه خی
کِه بِینه ای دلم هِه ها میکَه دی

اومامَه تا کِه شَر هِه آخرِم با
گریوه شو مُتَکا زیر سَرِم با

اومامَه تا کِه دردِم هِه زیا با
کِه تا بختِ شَلِم زیرْ دَس وُ پا با

اومامَه تا کِه غَمْ بوئَه بِرارِم
بوئَه بختِ سیِهْ وِ لادِرارِم

مِه طاعونِ غَمِم بِیسیتو وا دیر
نهاتِم سی هَمه تو دارَه واگیر

مِه سی سوختِن اومامَه بِیلْ بمیرم
کِه تا روزی بوئَم آروم نِمیرِم ...

#فهیمه_نعمت_زاده
#قوم#لر#