تا بوروب آشفته زلفون باشدا چون تاج ایلدی

تا بوروب آشفته زلفون باشدا چون تاج ایلدی
عقل و هوش و منطق و ایمانی تاراج ایلدی

« قاب قوسین » آیه سین تا شرح ائده عُشّاقه پیر
قاشلاریندان مشق آلیب تفسیر معراج ایلدی

نرگس مستیله باخدی اُول نگارِ می پرست
بو دلِ دیوانمی عرفانه محتاج ایلدی

گؤردی تا ملک محبّت شوکتون سلطانِ عشق
کون و امکان مُلکونی بِالمَرّه حَرّاج ایلدی

کعبۀ چاه زنخدانین گؤرن گؤندن کؤنول
ترک طُوفِ کعبه و هم ترکِ حجّاج ایلدی

من اَنَاالحق سرّینی بولمزدیم اوّلدن، منی
رازِ عشقه آشنا منصور حلّاج ایلدی

وصلدن یوخ بیر خبر! یارب گورورسن دلبریم
اشک چشمی فرقتونده بحر موّاج ایلدی

چوخ اوتوزدوم "فانیا" لیکن منی ثابت قدم
بو قمار عشقده رفتار لیلاج ایلدی



عباس داداش زاده ( فانی تبریزی )

#امام_زمان
#جمعه