اگر روزی بیا سر انتظارِم

اگر روزی بیا سر انتظارِم
وِ خَنَه وا مُؤه لوُ پُر دِ بارِم

میکِم تیمار نوزینِ خیالِ
می تازِم تا درِ حونه نگارِم

دِ سوزِ ای دل دَردو وِ ناله
خَوَر دارِش میکِم دِ حال زارِم

مُؤِم وِش ای شِراو ریزِ فقیرو
پیاله ی بِی که ژارِ ژارِ ژارِم

مَسِم کو چونکه عقلِ بی سرانجوم
نِمیله سر دِ کارِ دل دِرارِم

چی کشتی اِشکِسی بی ناخدایی
دِ وَختی بُردی وِ غارت قِرارِم

فقط خُت دونی وُ خُم دونِم ای دوس
چَنی بی تو وِ تنیایی دُچارِم

دِ بسکی درد مَنَ دی دل وُ بُغض
نمیله تِی کسی دادی وِرارِم

میترسم بعدِ مُردِه تا قیامت
وِریسه آه سردی دِ مِزارِم