سەلام محەمەد

ماموستا "سەلام محەمەد ئەمین"، شاعیری ناسراوی دوورە وڵات لە ۲۱ تەمموزی ۱۹۵۴ زایەنی، لە شاری کەرکووکی لەدایکبووە.



(۱)
نووسین وەك خوویەکی گەورەی
خۆش و ناخۆش
جار جار سەردانیم دەکات و
منیش لەوسەری دێمەوە:
نە بیر، نە خەیاڵ، نە زمان
نە شیعر و چیرۆك و رۆمان
فریای دەربڕین ناکەون
ئەوەی کە دەریشی دەبڕم
قەترەیەکە لە بارانە بەخوڕەکەی
شەوانی جارانی کەرکووك
چی بنووسم؟ چۆن بینووسم؟؟
بورکانێکی هاروهاج لە نێو دڵمدا
بەرپا دەبێت
بە چوار دەورا شەپۆل دەدات و پڕیشکی
ئاگردانی زامە نەبینراوەکانم
دەگاتە قووڵایی ئاسمان
چش با هەزار ئەوەندەی دی
چاوکراوە و شارەزا بی
هێشتا دەربڕین لە کونی
دەرزییەکی بچکۆلانە، باریکتر و تەسکترە
چۆن دەست پێبکەیت و بە چی
کۆتایی پێ بهێنیت و
لە ناخەوە بڵێی ئۆخەی؟
تازە چی دەبێ با ببێ
ئەم شەمەنەفەرە کوێرە
بە من و تۆ راناوەستێ
کافکا وتەنی ئەوەی کە دەیشینووسم
هەرگیز هەرگیز ئەوە نییە
کە خۆم دەمەوێ بینووسم
جار جار بێدەنگی خۆشتر و ئارامترە


(۲)
[هەبوو نەبوو]
نازانم نیگەرانییە یا جۆرێکه
لە پەشۆکان و خەمگینی
کاتێ پێکەنین و گریان بە یەکەوە
مەملەکەتی هەموو خانە و شانەکانی
هەستەکانمان جێدەهێڵن و
ئەوەندە دوور دەکەونەوە
شوێنەواریشیان دیار نییە
نە قاقای پێکەنینێکی پاك و بێگەرد
لە دڵەوە هەڵدەقوڵێ
نە هەنسکە هەنسکی گەرم
موچڕك ئاسا، کارەبایی و موگناتیسی
تەزوو به ناخى ناخماندا دەهێنێت و گریانێکی
دروست نەکراوی سروشتی
دەخوڵقێنێت
چ بارێکی ئینسانی سادە و ئاڵۆزە
کە نەتوانی پێکەنیت یا بە کوڵ بگریت
جاران ، دەك لە بەرت مرم جاران
رۆیشت و ناگەڕێتەوە
جاران بە مەستی و بەدمەستی
دەرەقەتی ئەم دڵ گوشرانە دەهاتم
دەمخواردەوە تا ئەو ساتەی
دەستم نەدەگەیشتە پێکی نیوە پڕم
لە داخی شەیتان و خودا
لە داخی مردن و ژیان
خۆم لە پەلوپۆ دەکەوتم
ئیتر نایەتەوە بیرم چۆن دەخەوتم
بەڵام دڵنیام خەوێکی موبارەك و ئاسمانی بوو
چونکە لەو جۆرە کاتەدا
خودا و شەیتان و ژیان و تەنانەت ئیزرائیلیش
هەموویان دەهاتنە خەونم
یاری چاوشارکێمان دەکرد
ئای بۆ مەستی و بادەنۆشینی پیرۆزی
جاری جاران
چۆن ئاو بە ئاگردا بکەی
ئاوا ژیلەمۆی نێو ناخی
سوورهەڵگەڕاوی هەموومان
بە دەم دووکەڵێکی تەڕی
نیوە رەش و نیوە سپی
قرچەقرچی پێدەکەوت و دەکوژایەوە
بە چزە چز دەوروبەری پڕ دەکرد لە
بۆنی شیعرە نەنووسراو و سووتاوەکان
ئێستا بادە تامی جارانی نەماوە
دەڵێی سیحری لێ کراوە
لە دوای یەك دوو بیرەی یەکەم
دەستم دەگرێ و
دەمبات بۆ ناو شووشەی عەدەم
لەوێش نە پێکەنین هەیە
نە گریان و فرمێسکی چاو
لە نێو ئەم شووشە گەرمەدا
هەستێکی وا دەمهەژێنێت
بیری ئاوی ناو کووپەکەی جاران دەکەم
کە بۆ خەیرات لە جادەکاندا دادەنران
ئەو ئاوە لە بادەی شووشەی
رەنگاوڕەنگ و جۆراوجۆری ئەم رۆژگارە
خۆشتر و بە نەشئەتر بوو
بیری بۆنی ئەو تەقیلە قنجەیش دەکەم
کە بە پەتێك یا زنجیرێکی شل و شاو
دەخرایە قەد کووپەکەوە
رۆژانە دەیان و سەدان تینووی رێبوار
ئاویان تیادا دەخواردەوە
ئەوسا نە کۆرۆنا هەبوو
نە نیشتیمانی فرۆشراو
نە مۆدێلی رەزا قورس و بێ ویژدانی
تازەی ئینسان
ئای بۆ جاران
ئەویشمان چوو
ئەویش بوو بە هەبوو نەبوو


گڵاڵەکردنی ئەم بابەتە: #زانا_کوردستانی