روزگار چ زُم ایخوی ک خوم ندونم

روزگار چ زُم ایخوی ک خوم ندونم
ایزنی کرکیت غم ب تال جونم

روزگار چ زُم ایخوی چ زُم ایجوری
آستاره بخت مونه بردی ب کوری

روزگار چ زُم ایخوی کار وام چ داری
وستیه پشت سرم دست نیورداری

روزگار چ زُم ایخوی خور ندارم
مو ز کار و بار تو سر نیدرارم

روزگار چ زُم ایخوی بستی تیامه
بستیه هم دونمه هم دست و پامه

روزگار چ زُم ایخوی بم ایزنی تش
نیلی ک وا خوم بوینم یه دمی خَش

روزگار چ زُم ایخوی وستی بجونم
لالمونی زیدیه ب ریشه زونم

روزگار چ زُم ایخوی کردی اسیرم
دی وردار دست ز سرم بل تا بمیرم

ای دل ای باور مکن تش بنشینه
ایلمون روز خوشی وه خوس بوینه

ای دل ای باور مکن دنیا خش آبو
چاله سرد ایلمون پر ز تش آبو

ای دل ای باور مکن ایلت بمهنه
روز نیا باور مکن ک شو بکهنه

ای دل ای باور مکن ک شو دراهه
روزگار ایلمون ز خو دراهه

ای دل ای باور مکن ک غم بسوسه
شاد بیای و شاد بری غم بگروسه

ای دل ای باور مکن باور نمنده
باد سرد روزگار ریشمه کنده