مراحل ازدواج به سبک بلوچی

مراحل ازدواج به سبک بلوچی

بلوچے سیر ءُ آروس ءِ بِندات چہ وڑ ءَ اِنت -


نام گِپت ؛

ھما اِنت چہ کسانی ءَ لھتے مات پِت گوش اَنت ؛ پلانی تئی اےجِنک مئیگ اِنت بزاں ما آئی ءَ پہ وتی بچک ءَ لوٹ ایں اے وھد ءَ بلے بَچک ءُ جنک سیر ءِ تیلّ ءَ نہ انت - اے سانگبندی گیشتر تریزتک ءُ ناکوزتکانی نیام ءَ پیش کَیت بلے باز کم -


ھَبربندی -

بَچک گوش ایت من ءَ پلان جاگہ ءَ زامات کن اِت - یا
بچک ءِ مات ءُ گوھار پیسر ءَ یک جنکے چم ءَ کن اَنت ءُ چہ بچک ءَ جُست گر اَنت کہ تو پلانی ءِ جنک ءَ گر ئے؟ اگاں بچک ءَ منّ اِت کہ من گران ئِے گڑا مات گوھار یا دگہ کماشیں مردمے رو اَنت پہ ھبر بندی ءَ بلے اے دور ءَ گیشتر بچک وتی دل ءِ پسند ئیگ ءَ گر اَنت - ھبر اِش کہ بُرت اگاں جنک ءِ مردماں منّ اِت ما شمئے بَچک ءَ زیر ایں پد ءَ گوش اَنت کہ ما چہ شما اینچو نشانگ یا سَریگ ءِ مال لوٹ ایں اینچو سُھر دستی ( نقد) لوٹ ایں اینچو جِھاز لوٹ ایں اینچو پُچ ءُ نِپاد لوٹ ایں وتی دْرواھیں شرتاں سالونک ءِ مردمانی دیم ءَ گوش اَنت - اگاں بچک ءِ مردماں منّ اِت کہ ما دْرستیں چیزاں دیوک ایں گڑا ایشانی ھبر بندی بیت جنک بچک ءِ دِشتار گوشگ بیت پد ءَ دگہ کس ءَ ھَک نیست کہ پہ اے نام گپتگیں جنک ءَ گْواجار بیار اَنت - چہ ایشی ءَ رند آروس ءِ چِن ءُ لانچ بیت -

بِجّار - بِجّاری -

سالونک ءِ مردم پیسر چہ سیر ءَ رو اَنت وتی مردمانی گور ءَ بجّاری گراَنت گیشتر سیاد ءُ وارس یا وتی ھاسیں مردمانی گور ءَ بِجّاری گِر اَنت - ھرکس وتی بِستار ءَ ایشانی ءَ بجّاری ءَ دات - ( مئے دَمگ ءَ پیسر ءَ سیر ءِ شپ ءَ چہ آیوکیں مردماں بجّاری گپتگ اِش - چہ شام ءَ رند یکّے ءَ کاگد ءُ کلمے زرتگ دیوان ءَ تَر ّاِتگ ءُ بجّاری گپتگ اَنت بلے مرچاں اے وڑ ءَ نہ اِنت -) وھدے کہ سیر ءِ سامان تیار بیت اَنت - سالونک یک روچے میتگ ءِ بچکاں بارت پہ دار ءِ چنگ ءِ واست ءَ -

یک روچے میتگ ءِ جنین پہ بِرنجانی چَنڈگ ءِ واست ءَ لوٹا ئینگ بہ اَنت - چہ ایشاں رند نوں جُلبندی بندات بیت -


جُلبندی -

سالونک ءِ مردم جُلّ ءِ روچ ءَ چہ پیسر پہ جُلبندی ءَ کینک ءُ بِسکوٹ شیرینی یے زیر اَنت -
نوں لوٹکی بندات بیت -سالونک ءِ کھول ءِ زالبول ءِ تَرّ اَنت وتی میتگ ءِ نزّیک گور ءِ ھمساھگاں داوت دے اَنت ءُ پہ دیریں سیاد ءُ وارسانی نیمگ ءَ ھم نپر دیم دے اَنت اے رنگ ءَ درست لوٹا ئینگ بہ اَنت - پہ جُلّ ءِ بندگ ءَ جنین رو اَنت - آ دیم ءَ بانور ءِ مردماں وتی تیاری کتگ بزاں آپ ءُ شربت چاہ ءُ چلیم پیسر ءَ تیار کتگ اَنت - سالونک ءِ مردماں کینک ءُ بسکوٹ ءُ بانور ءِ پَرداچ ھم گون اَنت - وھدے کہ سالونک ءِ مردم رس اَنت جُلّ اِش گوں وت ءَ گون اِنت - جُل یک مزنیں چادرے - سالونک ءِ مردم ھپت رند ءَ ھپت جنین جُلّ ءَ بند اَنت ءُ بوج اَنت - وھدے جُلّ اِش بست کینک ءُ بسکوٹ کہ سالونک ءَ مردماں بھر کُت ءُ دات اَنت پد ءَ واتَر بہ اَنت سالونک ءِ میتگ ءَ - درستیں جنین مُچ بہ اَنت ھِنّیانی تر کنگ ءَ چاپ ءُ نازینک ءُ اُلو لو جن اَنت - ھمے وھد ءَ سالونک ءَ گِر اَنت ءُ نندین اَنت - ھپت رند ءَ ھپت جنین بلے سالونک ءِ وتی نزّیکیں مردم آئی ءَ سر ءَ پاگے بند اَنت ءُ بوج اَنت - ھمد ءَ سالونک ءَ نازین اَنت - ھِنّی کہ ترّ اِش کت اَنت ھنّیانی سر ءَ دو دانگ کِشک کشّ اَنت ( زرب ءِ وڑ ءَ) ھمے کشکانی نیام ءَ اِشکرے ایر کن اَنت - نزّیک گور ءِ ھمساھگیں جنین لھتے روت وتی لوگاں -

دُزُّکی ءِ شپ -

ھمے اولیگیں شپ بزاں جلبندی ءِ شپ ءَ دزّکی ءِ شپ گوش اَنت - اے شپ ءَ میتگ ءِ ھمساھگ ءُ سیاد ءُ وارس کا اَنت ءُ سالونک ءَ نازین اَنت آئی ءِ دستاں ھِنّی کن اَنت - آدیم ءَ بانور ءِ مردم ھم نازینک جن اَنت ءُ بانور ءِ دستاں ھِنّی کن اَنت -

ھِنّی بند ءِ شَپ -

اے شپ ھاس ھِنّی ءِ شپ اِنت اے شپ ءَ درواھیں جنین مُچ بہ اَنت ھنّیانی تر کنگ ءِ وھد ءُ چاپ ءُ نازینک جن اَنت ءُ سالونک ءَ نازین اَنت - اے شپ ءَ گیشتر ھِنّی تر کن اَنت - شپ ءَ سالونک ءِ دستاں ھور گوں نازینکاں جنین ھِنّی کن اَنت - اے شپ ءَ گیشتر جنین کَیت - سالونک ءِ دستانی ھِنّی کنگ ءَ رند گڑا ھنّیاں بھر کن اَنت لھے ھمے آتکگیں جنیناں دے اَنت - لھتے جنین وتی دستاں ھمود ءَ ھِنّی کنت -

گُڈّی شپ سیر ئیگ اِنت -

اے شپ ءَ درواھیں ھمساھگ جنین ءُ مردین سیاد ءُ وارس درست لوٹا ئینگ بہ اَنت نوں اے شپ ءَ مردمانی مچّی گیشتر اِنت آروس ءِ آتکگیں مھمان درست یک جاھے ءَ نندا ئینگ بہ اَنت سالونک ءِ سنگت ءُ سیاد َ لھتے گوں چاھے لھتے گوِں سرجاھے لھتے گوں کمبلے لھتے .......

آروس ءِ آتکگیں مھمانانی ھِزمت ءَ کن اَنت مھماناں کہ چاہ ءُ آپ اِش دات گڑا کمو رند تر ءَ نوں شام ءِ بند ءُ بست ءَ کن اَنت -اگاں سالونک سیرینے بزاں سیٹے گڑا آئی ءِ آروس ءِ وراک وشتریں ب