بیر فاجعه دور آیریلیقون زینبه قارداش

بیر فاجعه دور آیریلیقون زینبه قارداش
هیچ وجهیله بو فاجعه جبرانه یتیشمز
آذوقه روحیمدی سنون وصل جمالون
وصل اولماسا جان فیض دوچندانه یتیشمز
آذوقه سیزم قوی یوزوه بیرده باخوم گیت
روحیم قوشونا یوخسا حسین دانه یتیشمز
چوخ قاره گونوم واردی حسین یولدا اوزاقدی
بی توشه باجون منزل ویرانه یتیشمز
آهنگ نوا واردی دیوللر قوری نی ده
نی ده آنام اوغلی من نالانه یتیشمز
امکانیم ایکی طفلیدی ویردیم سنه قربان
قربانسیز اولان فیض فراوانه یتیشمز
ایکاش اوزومده سنه قربان کسیلیدیم
یوخسولدی باجون چون الی قربانه یتیشمز
بیر بوسیه مشتاقم حسین لعل لبوندن
بیلمم یتیشر بوسه منه یا نه یتیشمز
عطشان دوداق عطشان دوداقی اوپسه گوزلدی
کوثر کوزه سی اول لب عطشانه یتیشمز
سال قولاریوی بوینوما قوی عشق گل ایتسون
بیر گل که اونا عطرده ریحانه یتیشمز
انور سنه نعمتدی بیوک طبع روانون
بو موهبت البته هر انسانه یتیشمز
دوش سجده شکرانیه حقه ایله سجده
کفران ایلین نعمت یزدانه یتیشمز

مرحوم استاد انور اردبیلی

یارباب الحسین...