باخیش اولسام نه اولار، نازلی گؤزونده یاشاییم

باخیش اولسام نه اولار، نازلی گؤزونده یاشاییم
نفسیم اولماق اوچون سئوگی سؤزونده یاشاییم

چؤللره سالما منی غربته ساکن ائله مه
قوجاغیندیر وطنیم ساخلا اؤزونده یاشاییم

یاغیشین یاغماسینا عشق هاواسی باعث اولار
اورگین دولسا اگر آغلا گؤزونده یاشاییم

گؤزلرین عالمینی من کیمی بیچاره بیلر
گؤزلریندن دوشورم سانکی یوزونده یاشاییم

بودا عشق آتشی دیر هرکسی یاندیرماز اینان
یاندیریرسان منی سن ،اودلا کؤزونده یاشاییم


علی دومان