مو کینم؟ مو یه مال او بردیم/

مو کینم؟ مو یه مال او بردیم/
یه تش مین جون گگه مردیم/
نهیوی که گوشی و بنگس نوی/
غریوی که کس همدرنگس نوی/
بلیطی که پیره و بلگس نیا/
و خوس پیت ایاره و مرگس نیا/
تش کور ایلم هاکشترم/
ز کوگی که بی دای تهنا ترم/
مو کینم؟ یه دلتنگ تو مین دل یه بی آرمون کرو مین دل/
مو زحم زمینم که چوهمستمه/
اوی کار(کالنیدن. کشتن) دردم که رهمستمه/
کلوسی که وا ریشه ها چیدنس/
کناری که وا برد تینیدنس/
کناری که دی نا نداره و دل/
کناری ک دی سا نداره و گل/
کل خوم خومه هی بلا ایکنم/
سر اینم و گل خو پلا ایکنم/
تش بی کسی مین جون مونه/
زمین پر ز خور گگون مونه/
شو بی کسیهامه مه نیبره/
خدا هم و حال مو ره نیبره/
یتی تش یتی یخ مونه آفری/
خدا مین برزخ مونه آفری/
هزار آرمون مین دل پوهدومه/
مو وا دیلخ آرمون سوهدومه/
مو هرسی ندیدوم ک دریا بوهه/
ندیدم دلی چی مو تهنا بوهه/
مو دندال سی ای غریو ایکنم/
سر گور خوم گاگریو ایکنم/
مین آسمونم همس اور ایا/
خوشی تا ایا پیش مو صور ایا/
توم عاسل زهر کرده خدا/
میر وا دلم قهر کرده خدا/
همس خو ایبینم که ورستمه/
ایتیچم و کس نیگره دستمه/
همس خو ایبینم که او ایبرم/
یه شوگرد شیمی به شو ایبرم/
همس خو ایبینم که مار ایزنم/
خومه تی بلیطی و دار ایزنم/
همس خو ایبینم که شو نیروه/
الازنگی امشو و خو نیروه/
همس خو ایبینم که شیوستمه/
هم ایخندم و هم گریوستمه/
کسی نی ک سیلی و کارم کنه/
میر دی ز ای خو بیارم کنه/
مو کینم؟ مو کینم یه ایسوف (یوسف) که کس نیخرس/
ی تهنا ک دی آل هم نیبرس/
دل تنگ مو غم و باره همس/
ایگوی دینشت بی خراره همس/
ایر چ ز پا وست و وا کل نکرد/
کسی سیل تهنایی دل نکرد/
قاسم سلیمانی.