سەلام محەمەد

ماموستا "سەلام محەمەد ئەمین"، شاعیری ناسراوی دوورە وڵات لە ۲۱ تەمموزی ۱۹۵۴ زایەنی، لە شاری کەرکووکی لەدایکبووە.



(۱)
هێشتا منداڵ بووم کە تۆم ناسی و خۆشم ویستی
دەیانگوت ماڵت لە ئاسمانە بۆیە هەمیشە تا درەنگانێ
تەماشای ئەستێرە دوورە بێ ژمارەکانم دەکرد
چاوەڕێ بووم لە پڕێکدا دەرکەویت
بێجگە لە سەرت جەستەتم
وەك جەستەی بنیادەمێك دەبینی
کە جلی ئاورێشمینی سپی و
تریفەییت پۆشیبوو
نە هاتیت و نە دەرکەوتیت
تا گەورەتر دەبووم خولیای ناسینی تۆیش
فراوانتر دەبوو
شاران و وڵاتان گەڕام بە دیدارت شاد نەبووم
باوکم دەیگوت : ئەگەر بە وردی قورئان بخوێنیتەوە
لەوێ شارەزای دەبیت و بە چاوی روح دەیبینیت
رەنگە دە جاران قورئانم خەتم کردبێت
وەك دەڕراخەکانی سەردەمی پێغەمبەر
چەند سوورەتێکی درێژم بە تەواوی ئەزبەر بوو
بەڵام تۆ هەر نەهاتیت و هەر دەرنەکەوتیت
پرسیارەکان زۆرتر دەبوون
وەڵامەکانیش کەمتر و کەمتر و کەمتر
وام لێهاتووە جار جار
لە دارستانێکی چۆڵ و چڕ و سامناکدا
بە تەواوی هێزەوە بانگت دەکەم:
لە کوێی ئەی خودا جوانەکەم تۆ لە کوێی؟
تەنیا گوێم لە دەنگدانەوەی خۆمە:
لە کوێی ئەی خودا جوانەکەم تۆ لە کوێی؟
چۆلەکەیك لەولاوە دەجریوێنێ
با ورشەی دێ و رەوە قاز و قوڵینگێك
بە نەزمێکی جوان و دڵگیر بەرەو باکور کۆچ دەکەن
من نە لە زمانی با و نە لە جریوەی چۆلەکە تێدەگەم
نە وەك حەزرەتی سڵێمان راز و نیازی
قاز و قوڵینگان دەخوێنمەوە!
من هیچ نازانم و سەرم لە هیچ دەرناچێ
تەنانەت توانای دوو دێڕە شیعریشم نەماوە
بیانکەم بە گوڵ و بیاندەم لە یەخەی یار
تۆ لە کوێی ئەی خودا جوانەکەم؟


گڵاڵەکردنی ئەم بابەتە: #زانا_کوردستانی