سارا پیشتیۆان

خاتوون "سارا پیشتیۆان" شاعیری هاوچەرخی کورد، له شاری کەرکووک لە دایک‌بوو و ئیستا بە سڵیمانی دانیشتوجیە.



(۱)
جوانترین باوەش باوەشی ئێمە بوو
بەڵام ژیان بوو بەو پیاوە بەتەمەنەی
که
کەنترۆڵەکە لە‌ دەستی ئەندامێکی
خێزانەکە ئەسێنێتو
لە مۆسێقایەکی خۆشەوە ئەیکاتە سەر
هەواڵە پڕ لە مەرگەساتەکانی ئەم شارە


(۲)
ئەم فاڵچیانە درۆ ئەکەن
هەموو جارێ لەکاتی فاڵا
ناوی تۆ ناهێننو نایڵێن.


(۳)
نزات بۆ ئەکەم لای خودا
ژنێک بخاتە ژیانتەوە
ژن بوونی منت لەبیر بباتەوە
بڕۆ بێ ئاوڕ دانەوە
من لە دووریت نزات بۆ ئەکەم
بەشی تۆش دووعا بۆ ئەو ئەکەم
تا خودا لە ژیان ئەیهێڵێتەوە
بە ئەشقی تۆوە هەموو ڕۆژێ چاو بکاتەوە
گوێ مەدە بە من کە چۆن ئەسوتێم
ئەزانم بەهێندەی من تۆش بێ چارەی
دڵت لێرەیەو ناهێڵن پێم بگەی
دەی تازە منو تۆ قوربانی دەستی
ئەم ژیانە تاڵە بێ هەستەین
گرینگ ئەوەیە ئیدی تۆ باش بیت
لای من بیت یان هەر کەسێک
نەهێڵی دڵ تەنگی بناسیت


(۴)
مەڕۆ بەجێم مەهێڵە
خۆت لە دێڕە شعرێکم بشارەوە
با تەنیایی ژوورەکەم نەیەتە ڕوحمەوە
تۆ بڕۆی من شعر بۆ کێ بڵێمەوە
تۆ بڕوی لەبەردەم ئاوێنە
خۆم بۆ کێ بڕازێنمەوە
مەڕۆ با بەداخی دووریشمان نەکولێمەوە
با بۆ بۆنێکی ملت منەتی خەیاڵ هەڵنەگرمەوە
خۆت لە تاڵێکی قژما بشارەوە
لە ناو ماچەکانمان ونبەو مەیەرە دەرەوە
تۆ بڕۆی من چ هۆنراوەیەک بهۆنمەوە
بۆنی سلێمانی لە باوەشی کێیا بدۆزمەوە.


(۵)
كە هاتیتە ژوورەكەم،
هەرچی بێزاری كردیت بیشكێنە
دڵم نەبێت.


گڵاڵەکردنی ئەم بابەتە: #زانا_کوردستانی